རིག་སྟོབས་འགྲན་བསྡུར་གྱི་གཟིགས་གཟོས་སྤྲོད་པའི་བྱེད་སྒོ་སྤེལ་བ།
སྤྱི་ལོ༢༠༡༨ལོའི་ཟླ༡༠ཚེས༡༥ཉིན་གྱི་ཞོགས་པ་རེ་གཟའ་ཟླ་བའི་རྒྱལ་དར་བསྒྲེངས་བའི་དུས་སྐབས་དང་བསྟུན་ནས། སློབ་དུས་གོང་མའི་སྐབས་སུ་རང་སློབ་གྲྭའི་སློབ་དཔྱོད་ཁང་དང་བོད་ཡིག་ཚོ་ཆུང་གིས་མཉམ་དུ་གཉེར་བའི་ལོ་རིམ་བདུན་པ་དང་བརྒྱད་པའི་སློབ་མ་ཚོགས་པ་ཆེ་བ་གཉིས་སུ་བགོ་འགྲེམས་བྱས་ཏེ་རིག་སྟོབས་འགྲན་བསྡུར་གྱི་བྱེད་སྒོར་བྱ་དགའ་བདག་རྐྱེན་སྤྲད་པ་རེད།
རིག་སྟོབས་འགྲན་བསྡུར་གྱི་ནང་དོན་ཐད། ཐོག་མར་བསླབ་གཞིར་འཁོད་པའི་ནང་དོན་གཙོར་འཇོག་བྱས་ཡོད་པ་དང་། དེ་ནས་ས་སྐྱའི་ལོ་རྒྱུས་དང་འབྲེལ་བའི་ཤེས་བྱ་དང་ལོ་རྒྱུས་མི་སྣའི་སྐོར། ཚན་རྩལ་སྐོར་གྱི་ཤེས་བྱ། ཀུན་སྤྱོད་སློབ་གསོ་དང་མི་གཤིས་གསོ་སྐྱོང་སྐོར་གྱི་ཤེས་བྱ། རྒྱུན་གཏན་གྱི་གཙང་སྦྲ་འཕྲོད་བསྟེན་སྐོར་གྱི་ཤེས་བྱ་སོགས་སྣ་མང་ཕུན་སུམ་ཚོགས་པའི་ནང་བཀོད་སྒྲིག་བྱས་ཡོད་པ་དག་སློབ་མའི་སེམས་ཀྱི་མོས་པ་དང་མཐུན་ཆེ་བས་ཐོག་མའི་ཧུར་བརྩོན་གྱི་བསམ་པ་སྐོང་འཐེན་གྱི་ནུས་པ་ཤུགས་ཆེར་ཐོན་ཐུབ་པ་བྱུང་ཡོད་ཅིང་། བོད་ཡིག་སློབ་ཁྲིད་གནང་མཁན་རྒན་ལགས་ཚང་མ་བྱེད་སྒོའི་ལས་དོན་མི་སྣར་བཀོད་སྒྲིག་བྱས་པས་ཚོགས་རའི་སྒྲིག་ལམ་ཡང་དག་སྲུང་ཐུབ་པ་དང་། བྱེད་སྒོའི་ནང་དོན་གོ་རིམ་ཇི་བཞིན་ཚགས་ཚུད་པའི་ངང་སྤེལ་ཐུབ་པ་བྱུང་ཡོད།
ད་ཐེངས་བྱེད་སྒོ་འདིར་ལོ་རིམ་བདུན་པ་དང་ལོ་རིམ་བརྒྱད་པ་གཉིས་རེ་རེ་བཞིན་ཨང་རིམ་དང་པོ་གཅིག་དང་། གཉིས་པ་གཉིས། གསུམ་པ་གསུམ། བསམ་པའི་དཔལ་ཡོན་གྱི་བྱ་དགའ་རེ་བཅས་ལོ་རིམ་རེར་ཁྱོན་བྱ་དགའ་ཐོབ་མཁན་གྱི་འཛིན་གྲྭ་བདུན་རེ་བྱས་པས་བྱ་དགའ་ཐོབ་པའི་ཁྱབ་ཁོངས་རྒྱ་ཆེ་ལ། བྱ་དགའི་མ་དངུལ་ཅུང་མང་བ་བཅས་བྱུང་བས་སྐུལ་ལྕག་གི་ནུས་པ་མི་དམན་པ་ཐོན་ཐུབ་པ་བྱུང་སོང་།