༡
འགྱུར་བཞིན་པ་ནི་ང་རང་རེད་ལ།
བཞུར་བཞིན་པ་ནི་དུས་ཚོད་རེད།
དུས་ཚོད་ཀྱི་འཁོར་སྐྱོད་རེ་རེའི་ཁྲོད་ན་ང་ཡི་ཚེ་སྲོག་གི་ཁྲག་རྒྱུན་འདྲེས་ཡོད།
ནམ་ཞིག་དུས་ཚོད་ཀྱི་ཐག་སྒྲ་ཆད་སོང་ན།
དེ་དུས་ངའི་ཚེ་སྲོག་གི་རྒྱུ་བ་ཆད་སོང་བ་ཡིན།
དེ་དུས་ཞེན་ཆགས་ཀྱི་ཐག་གུ་གཉེན་ཉེ་ལ་མདུད་པ་ཐེབས་ནས།
ང་རང་འཁྲེང་སེམས་ཀྱི་ཕྱིར་མིག་ཡང་ཡང་ཕྱོགས་དགོས་ཨང་།
ང་ལ་དགོས་རྒྱུ་ནི་རང་དབང་གི་འཇིག་རྟེན་ཞིག་ཡིན་མོད།
འོན་ཀྱང་། ངས་གང་མང་ཞིག་ལ་བདག་འཛིན་བྱས་པའི་རྐྱེན་གྱིས།
རང་དབང་གི་འཇིག་རྟེན་ཞིག་འཐོབ་རྒྱུ་དཀའ་ཚོད་རེད།
གལ་ཏེ་ང་གློ་བུར་དུ་ཤི་སོང་ན།
ང་ལ་བརྩེ་མཁན་དང་དུང་མཁན་དག་གིས།
ང་ཡི་ཕྱིར་དུ་མིག་ཆུ་མི་འཕེན་རོགས།
ང་ཡི་ཕྱིར་དུ་ངུ་ཤུམ་མི་བྱེད་རོགས།
དེ་ལས་ལྡོག་ཏེ་སྙན་ངག་གི་ཕོ་བྲང་ནང་དུ་ང་ཡི་མིང་བྱང་འབྲི་རོགས།
སྙན་ངག་གི་བརྗོད་བྱའི་གསེང་ན་ང་ཡི་ལོ་རྒྱུས་བསྟིམས་ཏེ།
སྐྱེ་བ་ཕྱི་མ་འམ་ཕྱི་མའི་ཕྱི་མ་ཞིག་ལ།
ངེས་པ་དོན་གྱི་སྙན་ངག་པ་ཞིག་གི་སྐྱེ་བ་ལེན་པར་ཤོག་ཅེས་སྨོན་ཚིག་བཀོལ་རོགས།
ང་རང་སྙན་ངག་ལ་དགའ་བའི་མི་བུ་ཞིག་ཡིན།
འོན་ཀྱང་། ངས་སྙན་ངག་འབྲི་མི་ཤེས།
སྐབས་རེར་ངས་སྤོབས་པ་ཆེན་པོའི་ངང་འཇིག་རྟེན་འདིར་ཡོད་ཚད་སྙན་ངག་ཅིག་རེད།
ང་ནི་སྙན་ངག་གི་ཀློང་ན་སྐྱེས་ཏེ་སྙན་ངག་གི་ཁྲོད་ནས་མུ་གེ་འཆི་འགྲོ་བ་དེ་ཡིན་ཞེས་བརྗོད་མྱོང་།
སྐབས་འགར་ང་གང་ཞིག་ནས་འོངས་ཏེ་གང་ཞིག་ལ་འགྲོ་དགོས་པ་ཡང་ཤེས་ཀྱིན་མེད།
རེད་ཨང་། འཇིག་རྟེན་འདི་ཇི་འདྲའི་དགོད་བྲོ་ཨང་།
༢
ང་རང་གློ་བུར་དུ་ཤི་སོང་ན།
ནམ་ཞིག་ང་རང་གློ་བུར་དུ་གནམ་ས་གཉིས་མགོ་རྟིང་ལོག་ནས་མུན་པའི་གྲོང་དུ་ཐིམ་སོང་ན།
སྐབས་དེར་ང་རང་།
ཞིབ་འཇུག་བྱ་རྒྱུར་ལུས་པའི་ལོ་རྒྱུས་མང་པོ་དང་།
བཀླག་འཕྲོར་ལུས་པའི་སྙན་ངག་གང་མང་ཞིག་ལ་རྣམ་ཤེས་འཁོར་ངེས།
དེ་དུས་ལོ་རྒྱུས་ཀྱི་དེབ་དང་སྙན་ངག་གི་དེབ་དག་མཆོད་མེ་རུ་བསྒྲོན་ནས་ང་ལ་གདེག་རོགས།
སྙན་ངག་ནི་དྭངས་གཙང་གི་གཙང་པོ་བཞིན་ལྷད་མེད་ལ།
སྙན་ངག་ནི་མཁའ་དབྱིངས་ན་རྒྱུ་བའི་ཆུ་འཛིན་བཞིན་དཀར་གཙང་ཞིག
སྙན་ངག་ནི་ནམ་མཁའ་སྤྲིན་བྲལ་གྱི་དཀྱིལ་འཁོར་དང་འདྲ་ལ།
སྣ་ཚོགས་ཀྱི་བྱིན་བརླབས་དང་གཉིས་སུ་མ་མཆིས།
ངའི་སེམས་པ་འདི་སྡུག་ནས་བུ་ཡུག་གི་ཀློང་ན་ཆས་དུས།
ལྷིང་འཇགས་ཀྱི་ཁོར་ཡུག་སྤྲུལ་མཁན་ནི་སྙན་ངག་ཡིན།
ང་ལ་ད་ལྟའི་རོགས་པ་ནི་སྙན་ངག་ཡོད།
སྙན་ངག་ཡོད་པས་ད་གཟོད་ང་འདི་ལྟར་འཚོ་བཞིན་ཡོད།
འོན་ཀྱང་། ང་རང་གློ་བུར་ཤི་སོང་ན།
ང་དང་ཉེ་ཤོས་ཀྱི་མི་དག་གིས།
ང་རང་ལམ་སྟོན་གྱི་ཆེད་དུ་སྙན་ངག་རེ་བྲིས་ནས་ངའི་མིང་ནས་འབོད་རྒྱུ་མ་བརྗེད།
༣
ང་རང་གློ་བུར་དུ་ཤི་སོང་ན།
ང་རང་གློ་བུར་དུ་འབྱུང་བ་བཞི་གཅིག་ལ་གཅིག་འཐིམ་ནས།
འཇིག་རྟེན་གྱི་དཀར་ངོགས་འདིར་ག་ལེར་གྱེས་ཕྱག་ཕུལ་ན།
རླུང་བུ་ཞིག་ལ་གཤོག་པ་སྤྲད་པ་བཞིན་གང་སར་མྱུལ་དུས།
བར་དོས་ང་རང་བསློག་སྲིད་དམ།
ཡང་ན་ང་རང་གིས་བར་དོ་བསློག་སྲིད།
ཡང་མིན་ན་གཞན་ཞིག་གིས་ང་རང་བསློག་སྲིད།
མང་པོར་མང་པོ་ཞིག་གིས་བཤད་རྒྱུན་ལ།
ལས་ཀྱི་བུ་ཆུང་དཀར་ནག་ཟེར་བ་ཞིག་ཡོད་སྐད།
དེ་གཉིས་ནག་པོའི་ཆ་དེ་སྙིང་རྗེ་མེད་ན་ཐང་མོད།
འོང་ཀྱང་དཀར་པོའི་ཆ་དེས་ང་ལ་སྙིང་རྗེ་ཡི་ཚུལ་དུ།
བདེ་ལམ་དུ་གཏོང་སྲིད་དམ།
དེ་ཡང་ཡིན་གྱི་མ་རེད།
ང་ལ་རྒྱ་མ་ཞིག་ཡོད་སྲིད།
རྒྱ་མ་དེ་ལྐོག་གྱུར་ཞིག་རེད། ཤིན་ཏུ་ལྐོག་གྱུར་ཞིག་གོ།