གཏམ་དཔེ།

༡སྒོར་མོ་རྔ་འདྲའི་གྲོས་ཤིག་བྱེད། ། གྲུ་བཞི་ཤོ་འདྲའི་གྲོས་ཤིག་བྱེད།

བསྟན་དོན།  ཚད་ལྡན་གྱི་གྲོས་བྱེད་པའམ་གཙོ་བོ་རྣམས་འདུས་ཏེ་གྲོས་བྱས་པ།

༢༽ བློ་རྩེ་གཉིས་ཀྱིས་འདོད་དོན་འགྲུབ་ལེ་མིན།  ཁབ་རྩེ་གཉིས་ཀྱིས་འཚེམ་བུ་ཡོང་ས་མེད།

བསྟན་དོན། བསམ་རྒྱུ་མང་ན་ལས་དོན་མི་འགྲུབ་པ།

༣༽ ནང་དཔའ་བོའི་དཔའ་གྲལ་མ་ཞིག་ན།  །ཕྱི་གེ་སར་དམག་ལ་སྐྲག་མི་དགོས།

བསྟན་དོན། ནང་མཐུན་སྒྲིལ་ཡོད་ན་ཕྱི་དགྲ་གང་ལའང་སྐྲག་མི་དགོས་པ།

༤༽ བདེན་རྫུན་བརྟག་ནས་མ་བྱས་ན། ། ཕོ་གསར་ངར་དེ་ཁྱི་ངར་ཡིན།

བསྟན་དོན། ཉམས་མྱོང་མེད་པའི་ང་རྒྱལ་ཆེ་བ་ནི་རང་ཕམ་པའི་གཞི།

༥༽ཧམ་པ་རི་ཙམ་མ་བཤད་ན། ། བདེན་པ་གཡག་ཙམ་ཐོབ་ལེ་མིན།

བསྟན་དོན། ཧམ་པ་བཤད་ནས་བདེན་པ་ཐོབ་རེ་བྱེད་པ།

༦༽ ཕོ་རབ་གཅིག་གི་བློ་རྩེ་ལས།  ། ཕོ་འབྲིང་གསུམ་གྱི་གྲོས་བཟང་དགའ།

བསྟན་དོན། བྱ་བ་གང་ལའང་མི་མང་པོའི་བློ་གྲོས་བཏོན་ན་ཐབས་ཤེས་མང་བ།

༧༽ གྲོས་མགོ་ཤེས་རབ་ཅན་གྱིས་རྩོམ།  །གྲོས་ཐག་བསོད་ནམས་ཅན་གྱིས་བཅད།

བསྟན་དོན། བྱ་བ་ཞིག་རྩོམ་པར་ཤེས་རབ་དང་ལས་བསོད་འཛོམས་དགོས་པ།

༨ ༽མཐོ་ལ་ཚད་ན་མཐོ་ལ་ཚད།  ། འདོམ་ལ་འཇལ་ན་འདོམ་ལ་འཇལ།

བསྟན་དོན། བྱ་བ་བབ་དང་བསྟུན་ནས་བྱེད་པ།

༩༽མདའ་བརྒྱབ་པས་མི་ཆོག་གཞུ་ཆོག་ངོམས།  མདུང་བརྒྱབ་པས་མི་ཆོག་བ་དན་ངོམས།

རྡོ་བཏང་བས་མི་ཆོག་ལག་ངར་བསྒྲེངས། མིག་བལྟས་པས་མི་ཆོག་མིག་ལོག་བགྲད།

བསྟན་དོན། གནོད་འཚེ་བྱས་པས་མི་ཚད་འཇིགས་རྔམ་སྟོན་པ།

༡༠༽ ཁ་བཤད་ཆུ་ཡི་ལྦུ་བ། ། ལག་ལེན་གསེར་གྱི་ཐིགས་པ། །

བསྟན་དོན། ཁ་བཤད་མང་ཡང་ལག་ལེན་ཉུང་བ།

༡༡༽ ཕོ་རྒོད་པོ་རང་གིས་མ་བྱུང་ན།། མཚོན་རྣོ་པོ་མི་ཡི་ལག་ཆ་ཡིན། །

བསྟན་དོན། རང་གིས་མ་འཇོན་ན་ཐམས་ཅད་གཞན་ལ་ཤོར་བ།

༡༢༽ གཏམ་དང་རལ་གྲི་གཉིས་པོ་འདི། །རྩེ་ནས་མི་འཆང་ཡུ་ནས་འཆང་།།

བསྟན་དོན། བྱ་ལུགས་བྱེད་སྟངས་མ་ནོར་བ་དགོས་པ།ཡང་ན་གཏམ་གྱི་ཕུགས་དང་རྩ་བ་དེད་ནས་ཤུགས་ཀྱི་དོན་རྟོགས་དགོས།

༡༣༽ ཕུ་ལུང་པའི་ཕུ་ཐག་རིང་མི་རིང་།   །མདའ་གཙང་ཆབ་སྔོན་མོ་མཐོང་བས་ཤེས།

བསྟན་དོན། མཐོང་ཐོས་ལ་དཔག་ནས་གནས་ཚུལ་དངོས་ཤེས་པ།

༡༤༽ བྱེད་རྒྱུ་གླ་བའི་སྤུ་ལས་མང་།  ། སྡོད་ཚུགས་ཉིན་མོའི་སྐར་ལས་ཉུང་། །

བསྟན་དོན། མི་བྱེད་དགུ་བྱེད་མང་བ།

༡༥༽ བྱ་མང་བྱུར་གྱི་སྣ་འདྲེན།   ཁ་མང་དགྲ་བོའི་གཡབ་ཤིང་།

བསྟན་དོན། བྱ་རྒྱུ་བཤད་རྒྱུ་མང་ན་སྐྱོན་ཡོང་བ།

༡༦༽ཤེས་པ་ཁ་ནས་མ་ལབ་ན།  ། བློ་གྲོས་ཁོག་པའི་ནང་དུ་རྒས།  ། ཤིང་བཟང་པགས་པའི་འོག་ཏུ་རུལ། །

བསྟན་དོན། གང་ཤེས་མ་ལབ་ན་སྐྱོན་དུ་སོང་བ།

༡༧༽ ལྷ་ཁང་རྙིང་པ་ལ།  རྟེན་བཤད་གསར་པ།

བསྟན་དོན། དོན་དངོས་ལས་ལྡོག་པའི་གཏམ་འཆལ་བཤད་པ།

༡༨༽རང་སར་མི་བཞག་བསམ་བློ་ཐོངས།   མི་སར་རང་བཞག་བསམ་བློ་ཐོངས།

བསྟན་དོན།  མི་གཞན་ལའང་རང་ལྟར་བསམ་ཤེས་བྱ་དགོས་པ།

༡༩༽ དཔེ་མེད་ཀྱི་མཆོད་རྟེན་བཞེངས་པ་ལ།    ལུང་མེད་ཀྱི་རབ་གནས་བྱེད་དོན་མེད།

བསྟན་དོན། ཁུངས་ལུང་མེད་པའི་བྱ་བ་བྱས་མི་ཉན་པ།

༢༠༽ ལ་ལམ་མེད་ལ་ལམ་བུ་གསར་དུ་བཟོས།    ཆུ་ཟམ་མེད་ལ་ཟམ་པ་གསར་དུ་བཙུགས།

བསྟན་དོན། སྔར་མེད་གསར་སྤྲོས་བྱེད་པ།