巴罗老师作文《家乡》

ནམ་རྒྱུན་ངས་ཕ་ཡུལ་ཞེས་པའི་ཡིག་འབྲུ་གཉིས་པོ་ཁྲ་ཆུང་མིག་གིས་མཐོང་ཐེངས་རེ་དང་། དར་ལུང་རྣ་བས་ཐོས་ཐེངས་རེར། འཇིག་རྟེན་འདི་རུ་ཐོག་མར་ལྟེ་ཁྲག་འཕོ་སའི་ཞིང་གྲོང་དེ་རྟག་ཏུ་ང་རང་གི་ཡིད་ཀྱི་མེ་ལོང་ངོས་སུ་གསལ་ལེར་འཆར་འོང་གིན་འདུག ཕ་ཡུལ་དུ་ང་ལ་མི་ལུས་རིན་ཆེན་གྱི་རྟེན་བཟང་སྐལ་དུ་སྦྱིན་མཁན་དྲིན་ཆེན་ཡབ་ཡུམ་ཟུང་གི་བྱམས་དང་བརྩེ་བའི་རྟེན་མཁར་བརྩིགས་ཡོད་ལ། ཤ་རུས་གཅིག་པའི་ཕུ་ནུ་མིང་སྲིང་གི་བརྩེ་བ་དང་དུང་བ་རྣལ་མའི་གུར་ཁང་ཕུབ་ཡོད། ད་དུང་ལྕི་འདམ་གྱི་འཇིག་རྟེན་གསར་པའི་ནང་ང་ཡིས་ཕ་དང་ཁྱེད་ཀྱིས་མ་བྱེད་པའི་བྱིས་དུས་ཀྱི་རྩེད་གྲོགས་ཚོའི་མཛའ་གཅུགས་དྲི་མ་མེད་པའི་མཚོ་མོ་བསྐྱིལ་ཡོད། དེ་རུ་གནམ་སྔོན་མོའི་རང་མདངས་སྔར་ལས་གསལ་ལ། ས་དོག་མོའི་ཁ་ཞེང་དེ་བས་ཆེ། སྤྲིན་དཀར་པོའི་མཛེས་རིས་སྙིང་ལ་སྡུག་ཅིང་། དྲིན་ཉི་མའི་འོད་སྣང་ལྷག་ཏུ་འཚེར། ཕ་ཡུལ། ཁྱོད་ཀྱི་རུམ་དུ་དྭངས་གཙང་ཆུ་དང་ཆུ་ཕྲན་གྱི་ཤང་ཤང་བཞུར་སྒྲ་སྙན་མོ་རྟག་ཏུ་ཐོས་རྒྱུ་ཡོད་ལ། ཁྱོད་ཀྱི་པང་དུ་འཕུར་ལྡིང་གི་གཤོག་ཟུང་རྒོད་པའི་གཉིས་སྐྱེས་ཀྱི་ཚོགས་རྣམས་ཕན་ཚུན་འཚེ་བ་མེད་པར་ཀྱུར་ཀྱུར་དབྱངས་སྙན་འབྱིན་ཞིང་། དགའ་སྐྱིད་ཀྱི་གླུ་དབྱངས་འཇིག་རྟེན་སྐྱེ་བོའི་ཡིད་ཀྱི་གསོས་སུ་སྨིན། ཕ་ཡུལ། ཁྱོད་ཀྱི་པང་ན་མུ་ཁ་དང་མུ་ཁ་སྦྲེལ་བའི་རྣང་ཞིང་གྲུ་བཞིའི་སྟེང་གི་ནས་ཞིང་གི་སྐྲ་ལོ་བསེར་བུ་རླུང་གི་རྒྱུ་ཕྱོགས་དང་བསྟུན་ནས་གར་སྟབས་ལིང་ལིང་གི་དགའ་བའི་འགྱུར་བག་ཅི་ཡང་སྟོན་པས་སྐྱེ་བོའི་མིག་ཡིད་ཀྱི་དགའ་སྟོན་དུ་གྱུར།