མཛུབ་མོ།

སེམས་པ་ཁྲ་ཁྲ་འདི་ཧམ་ཤེད་ཆེ་བས།།

མཛུབ་མོ་གྲུང་གྲུང་འདི་ཞར་བར་བཏང་སོང་།།

ལོ་ཟླ་སྡུག་བརྩེགས་ཀྱིས་གསོག་སྒྲུབ་བྱས་པའི།།

སྡིག་པའི་ཁུར་པོ་འདི་བགྲང་ཐབས་བྲལ་སོང་།།

མཛུབ་མོ་ཞར་བ་འདི་སྨྱོ་འཚུབ་ཆེ་བས།།

སྡིག་དམོད་རྣོ་གྲི་དེ་གཞན་ལ་གཏད་སོང་།།

རང་གཞན་དགེ་སྐྱོན་གྱི་གཡུལ་ངོར་སླེབས་དུས།།

མཛུབ་མོའི་གདོང་མཆོངས་དེར་ཧོན་རེ་འཐོར་སོང་།།

རང་ཉིད་ཁེར་རྐྱང་དུ་འདང་ལ་རོལ་དུས།།

མཛུབ་མོ་ཞར་བ་འདི་གཉིད་ལ་ཡུར་འདུག།

རང་གི་སེམས་པ་འདི་མུན་པས་སྐོང་དུས།།

རང་ཉིད་རང་ནི་ལྷ་མཆོག་ཏུ་མཐོང་སོང་།།

ཐོབ་དང་ཤོར་བ་ཡི་འཛིང་རགས་གསེང་ནས།།

མཛུབ་མོ་ཞར་བ་ལ་ཞེ་སྡང་འབར་སོང་།།

ཁ་ལས་མིག་ཟུང་འདི་ཆེ་བར་འགྱུར་དུས།།

ལས་ཀྱི་ཕོ་ཉ་ཡང་སྐྲག་སྟེ་བྲོས་སོང་།།

ཁེ་གྲགས་གཏམ་གསུམ་གྱི་གནམ་སྐྱག་ཟགས་དུས།།

མཛུབ་མོ་ཞར་བ་འདི་ཧོབ་སྟེ་འཁུམ་སོང་།།

བདེན་རྫུན་ལེགས་ཉེས་ཀྱི་སྒོ་ཐེམ་བརྒལ་དུས།།

ཀྱོག་ཀྱོག་སེམས་པ་འདི་འདམ་ལ་བྱིངས་སོང་།།