མཁས་པའི་ཞལ་གདམས།
ཁྲེལ་མེད་ཀྱི་མི་རྣམས་ཨ། ཁྱོད་ཚོ་དཔའ་བོས་བཏོད་པའི་ལམ་དུ་འགྲོ་ཤེས་པ་ལས། དཔའ་བོའི་མཛད་རྗེས་དང་མཚན་སྙན་ལ་མོས་གུས་དང་བསྔགས་བརྗོད་མི་བྱེད་པ་མ་ཟད། ད་དུང་འཁང་ར་དང་སྡང་སེམས་འཛིན་དོན་ཅི་ཡོད།
༼དཔལ་དོན་གྲུབ་རྒྱལ་༽
རང་ལོ་སོ་གཉིས་སུ་ལོན་པའི་དགུན་ཟླ་ར་བའི་ཚེས་བཅོ་བརྒྱད་ལ་གངྒའི་ཆུ་འཐུང་ཞིང་། ལོ་དེའི་དགུན་ཟླ་ཧྲིལ་བོར་སྲིན་བུ་མཚོ་དཀྱིལ་དུ་ལྷུང་བ་ལྟ་བུའི་སྐྱོ་ཉམས་དང་བཅས་གྲོང་ཁྱེར་སྐྱ་ནར་གྱི་བུར་བསྡད་ཡོད་དོ།
༼དགེ་འདུན་ཆོས་འཕེལ་༽
ཀྱེ་མ་བསླབ་པའི་ཤེས་རྒྱ་དང་།
སྒོམ་པའི་ཉམས་མྱོང་མ་མཆིས་པར།
གང་དྲན་སྨྲ་བའི་ཁྲེལ་འདས་དག།
བསམ་ཞིང་བསམ་ཞིང་ཡི་རེ་མུག།
བརྟག་ཅིང་བརྟག་ཅིང་སྙིང་རེ་རྗེ།
༼ཤེས་རབ་རྒྱ་མཚོ་༽
ཀྱེ་སྐྱིད་ཆུ་སྔོན་མོ་ཨང་། རང་ཅག་གི་མ་འོངས་པ་ནི་དེ་བས་ཀྱང་མཛེས་སྡུག་ལྡན་ལ་འོད་སྣང་ཆེས་ཆེར་འཕྲོ་བ་ཞིག་ཡིན།
༼ཆབ་སྤེལ་ཚེ་བརྟན་ཕུན་ཚོགས་༽
རྒན་རབས་རྣམས་གྲྭ་ཚང་གི་སྲོག་རྩ། བར་མ་རྣམས་གྲྭ་ཚང་གི་གཞུང་ཤིང་། གཞོན་པ་རྣམས་གྲྭ་ཚང་གི་རྗེས་སྐྱོང་ཡིན་པས། རང་རང་གི་སྐལ་བར་བབ་པའི་ཁུར་དེ་མ་འདོར། བླ་མའི་སྲས། ཨ་མའི་བུ།
༼ཤེས་རབ་རྒྱ་མཚོ།༽
ལོ་ངོ་ཁྲི་སྟོང་མང་བོའི་རིང་ལ། ལམ་ཕྲན་འདི་རྒྱ་ཇེ་ཆེར་དང་ཁོད་ཇེ་སྙོམ། ཁྱོན་ཇེ་ཡངས་སུ་གཏོང་མ་ཐུབ་པ་དེ་ནི་ང་ཚོའི་ངོ་ཚ་ཡིན་པ་ལས་གནའ་མིའི་གླེན་རྟགས་ག་ལ་ཡིན།
༼དཔལ་དོན་གྲུབ་རྒྱལ།༽
མི་རིགས་རིག་གནས་དང་སྒྱུ་རྩལ་གྱི་ཁྱད་ཆོས་ལ་གཙིགས་འཛིན་མི་བྱེད་པའམ་མཐོང་ཆུང་བྱེད་པ་ནི་རིག་གནས་དང་བསམ་བློ་སྟེང་ནས་ཆེས་ཆེས་རྗེས་ལུས་ཀྱི་རྟགས་ཡིན་ལ་རིག་གནས་ཀྱི་ཡོན་ཚད་དང་བསམ་བློ་སྟེང་ནས་ཇི་ལྟར་སྔོན་ཐོན་དུ་སོང་ན་དེ་ལྟར་མི་རིགས་ཀྱི་རིག་གནས་དང་སྒྱུ་རྩལ་གྱི་རིན་ཐང་ཤེས་ནས་བརྩི་མཐོང་ཇེ་ཆེར་འགྲོ་བ་ཡིན།
༼དོར་ཞི་གདོང་དྲུག་སྙེམས་བློ།༽
ང་ཚོའི་མི་རབས་འདི་དག་སྔོན་བྱོན་མཁས་པ་ཚོའི་མདུན་ནས་གདོང་སྨད་དེ་འདུག་པ་ལས་མགྲིན་པ་གཟེངས་སུ་བསྟོད་མ་ཐུབ་པ་དང་། རིག་གནས་དར་སྤེལ་གྱི་ལྡོག་ཟླའི་སྐྱོན་ཡང་མི་འདོད་བཞིན་དུ་འཁུར་བ་ལས་གསར་བརྗེའི་བསམ་བློ་སྐྱེ་མ་ཐུབ།
༼ཚེ་གཏན་ཞབས་དྲུང་།༽
གཞན་ཕན་སྙིང་རྗེའི་སྣུམ་དང་བྲལ་ན་ཡང་།
རིག་རྩལ་ཐབས་མཁས་གློག་གི་ཆོ་འཕྲུལ་གྱིས།
དྲང་པོའི་མི་ལ་འཁྱོག་པོའི་ལམ་སྟོན་པ།
སྐྲ་སེར་སྤྲེའུའི་རིགས་ལ་དོགས་ཟོན་མཛོད།
༼དགེ་འདུན་ཆོས་འཕེལ།༽
