ཙན་དན་གྱི་གུ་ཡོག
ཀ་དག་སྟོང་ཉིད་ཇི་བཞིན་སྟོན་པའི་དབྱངས་གསལ་འཕྲུལ་གྱི་སྦྱོར་བ་འདི། །
ཁ་ངན་དུག་མཚོན་མུན་པའི་སྒྱོགས་ཀྱི་གཞན་སྡེ་བཅོམས་པའི་མདེལ་བྱས་ན། །
ག་ཐེར་ཐོད་པའི་རྣམ་བཀྲའི་རི་མོ་ཡེར་ཡེ་གྱེན་ཐད་ལངས་ལགས་ཀྱང་། །
ང་ཅག་རིགས་བཟང་བོད་དོ་སྒྲོག་ལ་ཁ་ལྐུག་ལྕེ་ཡི་དབང་པོ་ཆད། །
འཕྲུལ་གྱི་ལྭ་བ་ནག་པོ་ཁྲག་འཛག་ཧམ་གྱིས་བཅིངས་ལ་མུ་ཅོར་བྱེད། །
རྣམ་ཤེས་དམར་པོ་མེ་ལ་བསྲེགས་ཏེ་དུ་ནག་དཀྲིགས་ལ་ངོ་སོར་རློམས།།
ཇ་ནག་ཡང་ཏིག་འཁོར་ལ་སྟེར་འདི་དགེའོ་སྙམ་པའི་ཆོག་ཤེས་བྱེད། །
སྐྱིད་སྡུག་ཐམས་ཅད་སྒོར་ལ་བཅལ་བའི་སྲིད་པའི་སྲང་རྡོ་ཀྱེ་མ་ཧུད། །
ལྭ་བ་ནག་པོ་ཧར་གྱིས་དབྲལ་བའི་ཤེས་རབ་རལ་གྲི་བདག་ལ་རེ། །
རྣམ་ཤེས་སོན་པོ་སྟོང་གསུམ་ཉུལ་བའི་རྫོགས་ལྡན་དུས་དེ་འཆར་ལ་རེ། །
ཇ་རྐྱང་སྤགས་རྐྱང་འཚོ་བའི་ཁ་སྟབས་རང་ས་འདི་ནས་ཆད་ལ་རེ། །
སྲང་རྡོ་འདེགས་པའི་སྒྱུ་མའི་མཁན་པོ་མཁན་རབས་སྟོངས་པའི་དུས་ལ་རེ། །