སྤྱི་ལོ༢༠༢༡ལོའི་ཟླ༡༠ཚེས༡༢ཉིན་གྱི་ཕྱི་དྲོའི་ཚོགས་ཐུན་གཉིས་པ་དང་གསུམ་པའི་སློབ་དཔྱོད་བྱེད་སྒོའི་དུས་ཚོད་བེད་སྤྱད་དེ་རང་སློབ་གྲྭའི་སློབ་དཔྱོད་ཁང་གི་བཀོད་སྒྲིག་འོག བོད་ཡིག་སློབ་ཁྲིད་པ་རྒན་ཕུར་བུ་བུ་ཁྲིད་ལགས་ཀྱི་བསླབ་ཚན་ཉན་ཞིང་། བོད་ཡིག་སློབ་ཁྲིད་དགེ་རྒན་ཚང་མ་ཐེ་ཞུགས་བྱས་ཏེ་ཚ་ཚ་འུར་འུར་ངང་ནས་དཔྱད་འཇོག་སྤེལ་བ་མ་ཟད། དགོངས་ཚུལ་ལམ་ལྟ་བ་ལྷུག་སྩོལ་གནང་བ་རེད།
རྒན་ལགས་ཀྱིས་ཁྲིད་བྱར་འགྱུར་བའི་སློབ་ཁྲིད་ནང་དོན་ལ་གཞིགས་ཏེ། སྔོན་ཚུད་ནས་གྲ་སྒྲིག་ཨང་གསར་དང་ཚགས་ཚུད་པ་གནང་ཡོད་ཅིང་། ལྷག་པར་སློབ་ཁྲིད་ཀྱི་ནང་དོན་ལ་མཁོ་བའི་དཔྱད་གཞིའི་རྒྱུ་ཆ་མང་དག་ཅིག་འཚོལ་བསྡུ་དང་དྲ་ཐོག་ནས་ཕབ་ལེན་བྱས་ཏེ། བཪྙན་ཕབ་དང་དཔེ་རིས་སྟོན་ཡོད་ཅིང་། སློབ་ཚན་གྱེར་ཀློག་བྱ་རྒྱུ་དེ་རྒྱབ་ལྗོངས་རོལ་དབྱངས་འགྲོགས་ཏེ་སྒྲ་ཕབ་བྱས་ཡོད་པས། སྣ་མང་སྨྱན་སྦྱོར་གྱི་ནང་དོན་ཕུན་སུམ་ཚོགས་ལ། སློབ་ཁྲིད་ཀྱི་དགོས་མཁོ་དང་ཧ་ཅང་འཚམ་པོ་ཞིག་བྱུང་འདུག་པ་དེ་ནི། དེང་རབས་བྱང་ཚད་སློབ་གསོའི་ཁ་ཕྱོགས་དང་མཐུན་ཞིང་། རྒན་ལགས་ཁོང་རང་ཡང་གློག་ཀླད་རྩིས་འཁོར་དང་དྲ་རྒྱའི་ཕབ་ལེན་ཐད་ཀྱི་ཤེས་བྱ་ལ་བྱང་ཆ་ལྡན་པ་ཞིག་ཡིན་པ་ཤེས་རྟོགས་ཐུབ་ལ། སློབ་ཚན་ཁྲིད་ཐབས་ངོས་ནས་བརྗོད་ན། སློབ་ཁྲིད་ཀྱི་བརྒྱུད་རིམ་ཧྲིལ་པོའི་ནང་དོན་གསལ་བཤད་ཁ་གསལ་བ་དང་གོ་བདེ་བ། བརྗོད་བྱའི་ནང་དོན་གྱི་གཙོ་ཕལ་དབྱེ་འབྱེད་དོན་དང་མཐུན་པ། ངག་གི་འགྱུར་ཁུག་སྙན་ཞིང་ཞར་དང་ཞོར་ལ་སློབ་མར་ཡར་སྐུལ་གྱི་བསྟོད་ཚིག་གིས་ཡིད་སེམས་སློབ་ཁྲིད་དུ་ཕྱོགས་ནུས་པ། སློབ་ཚན་དབྱེ་ཞིབ་སྐབས། བསྟན་བྱའི་དོན་རྣམས་ཁ་གསལ་གོ་བདེ་བ་དང་། སློབ་ཚན་ནང་དུ་ཐག་གཅོད་བྱ་གཞི་གཙོ་བོར་གྱུར་པའི་དཔེ་དང་དཔེ་ཅན་གྱི་སྦྱོར་བ་རྒྱས་པར་སྤྲོས་ཡོད་པ་རྣམས་རེ་རེ་བཞིན་གཙོ་ཕལ་རྒྱས་བསྡུས་འཚམ་པའི་སྒོ་ནས་དབྱེ་ཞིབ་དང་ཐག་གཅོད་ཐུབ་པ་བྱུང་སོང་ལ། སྨྱན་ཆས་ཀྱང་གྲ་སྒྲིག་ལེགས་པར་བྱས་འདུག་པས། སློབ་ཚན་ཧྲིལ་པོ་བདེ་བླག་ངང་ལེགས་གྲུབ་ཐུབ་པ་བྱུང་སོང་།
མདོར་ན། ད་ཐེངས་ཀྱི་བྱེད་སྒོ་འདི་བཞིན་སྤེལ་བ་བརྒྱུད་ནས། ངེད་བོད་ཡིག་དགེ་རྒན་ཕལ་མོ་ཆེར་བློ་སྐྱེད་མི་དམན་ཙམ་ཞིག་ཐོབ་བྱུང་སྟེ། བྱང་ཚད་སློབ་གསོའི་འཕེལ་ཕྱོགས་འགྲོས་དང་བསྟུན་ནས། དགེ་རྒན་ནི་འཁྲབ་ཁྲིད་པ་དང་སློབ་མ་ནི་འཁྲབ་སྟོན་པ་ཡིན་ཞིང་། སློབ་ཁྲིད་ཀྱི་བགྱི་བ་ཧྲིལ་པོའི་ཁྲོད་དུ་སློབ་མ་གཙོར་བཟུང་གི་འདུ་ཤེས་བཅངས་སྟེ་སློབ་གསོ་སློབ་ཁྲིད་ཀྱི་ལས་དོན་སྤེལ་དགོས་པ་དང་དུས་མཚུངས། དགེ་རྒན་རང་ངོས་ནས་སྔོན་ཚུད་ནས་འབྲེལ་ཡོད་ཤེས་བྱ་དང་དཔྱད་གཞིའི་ཡིག་ཆ་མང་པོ་ཞིག་འཚོལ་ཪྙེད་ཐུབ་པ་བྱེད་དགོས་ལ། སློབ་ཁྲིད་ཀྱི་ལག་ལེན་དངོས་ནང་དེ་དག་ཚུལ་བཞིན་སྤྱོད་ནུས་པའི་ངེས་ཤེས་ཐུབ་པ་བྱུང་སོང་།